RadioMandoDav.Com

ULANDA TA TERMINA RELASHON DI SUPSIDIO KU AMFO

E aña akí ta yega fin na e supsidio di máksimamente 6,5 mion euro (mas o ménos 15 mion florin ku tur aña Ulanda ta duna fundashon AMFO (Antilliaanse Medefinancierings Organisatie). Na 2013 ta rònt af proyektonan andando.

Minister di Asuntunan Interno i Relashon den Reino, Liesbeth Spies, ta konta ku Kòrsou i Sint Maarten lo duna kontenido na e palabrashon ku for di 2013 nan ta bai tuma pa nan kuenta e tarea di supsidiá AMFO i ku nan lo duna e prioridat nesesario na kombatí pobresa i mehorá perspektiva di futuro di hubentut. Esaki ta importante tambe ku bista riba durabilidat di e proyektonan ku NGO-nan a ehekutá ku fondonan di AMFO.

durabilidat
For di aña 2009 a tuma aña 2012 komo punto di salida pa terminá supsidio di Ulanda na AMFO. Di pursi, e saneamentu di debe di 1,7 miar euro ta hasi ku Kòrsou i Sint Maarten mes por tuma responsabilidat pa e fundashon akí. Komo Boneiru, St. Eustatius i Saba entrante 10-10-2010 a bira munisipionan spesial di Ulanda, Ulanda i gobièrnunan di e islanan a tuma riba nan, pa entrante 2011 atendé ku e aktividatnan di AMFO na e islanan akí.

Riba petishon di AMFO pa prolongá ku un aña e plaso di e último adelanto, e minister di Asuntunan Interno i Relashon den Reino, Donner, a reakshoná aña pasá di un forma positivo. Na sèptèmber di 2011 e ta pidi minister-presidèntnan di Kòrsou i Sint Maarten nan kooperashon den traspaso gradual pa loke ta e dunamentu di supsidio di Ulanda na AMFO.

Komo te dato dia djawe ni Sint Maarten ni Kòrsou no a duna kontesta riba e proposishon di Ulanda pa na 2012 i 2013 den fase nan tuma e supsidio na AMFO pa nan kuenta, lapso di e último supsidio ulandes na e fundashon ta terminá e aña akí.
Ulanda komo úniko donante for di komienso di AMFO na 2002 te i ku 2012, a pone mas ku 180 mion florin disponibel pa e organisashon lokal akí finansiá organisashonnan nogubernamental (NGO-nan) na Antia Ulandes. Ta trata di proyektonan ku tin komo tema:

hubentut, ansiano, enfermo i hende ku desabilidat, mamanan tiner, enfoke integral di bario i asuntunan asina.
Durante añanan ku a pasa AMFO a kosechá hopi konosementu di i eksperensia ku kombatí pobresa. Minister Spies ta sali for di e punto di bista ku e ekspertisio akumulá lo keda disponibel pa poblashon lokal, tambe despues ku terminá e programanan di kooperashon ku Ulanda.

JURICKSON PROFAR KU ‘HITTING STREAK’ DI 25 WEGA

Ku tres hit mas ayera nochi den viktoria di 5-4 di su ekipo Frisco Rough Riders riba Midland, Jurickson Profar a ekstendé na 25 e kantidat di partido den kua el a bin ta bati di hit. Tambe el a embasá den su último 34 partidonan i ta sigui hala hopi atenshon.

E shortstop yu di Kòrsou den e organisashon di Texas Rangers ta realmente serio den su wega. Hopi ta konsider’é e shortstop di futuro den organisashon di Rangers. Pero tin algu ku kua mester tene kuenta, i esei ta ku Elvis Andrus (23 aña) tin e posishon ei duru tené. Miéntras ku Profar ta hungando na nivel Dobel-A, e ta produsiendo meskos ku Andrus ta hasiendo den Liga Grandi.

Ayera nochi el a konektá tres hit mas i tin averahe di .356 den su último 10 partidonan. Pero Andrus tambe tabatin un racha te ku djaluna di 32 wega den kua e ta embasá.
Ounke ta konsiderá ku ta mas difísil yega base den 32 wega siguí den Liga Grandi kompará ku den Dobel-A, ta konsiderá ku tòg mester tene kuenta ku Profar tin apénas 19 aña.

Nan no ta spera ku e yu di Kòrsou lo yega Arlington (siudat sede di Texas Rangers) asina lihé, sigur si tene kuenta ku Andrus tin kontrakt te ku 2014. Pero tambe ta tene kuenta ku lo por ‘deal’ Andrus promé òf durante di 2014 una bes ku lo e bira agente liber despues di e temporada ei.

Tambe e chèns ta grandi ku Profar próksimo temporada lo ta ku Round Rock den Tripel-A, ounke no ta improbabel ku si e sigui presta dje nivel ku e ta hasiendo ya e aña’ki lo e ta un nivel mas haltu.
Rangers no tin purá pa ‘rush’ Profar manda ariba. Na e momento aki nan tin un dje mihó shortstopnan hóben den wega. Pero Profar si ta pusha i kisas ta kestion di algun luna ku e ta kuminsá buska un otro reto.

E sifranan di Jurickson Profar:
Wega           36
Turno na bate              148
Kareda anotá       24
Hit           43
Doblete           11
Tripel              4
Homerun          4
Kareda empuhá       19
Base por bola       12
Ponche           20
Base robá          6
Out den robo          0
Porsentahe embasá   .341
Averahe             .291

DREAMS, ERA I DOBLE “R” KLASIKO

Dia 2 di yüni próksimo ta programá pa tuma lugá tremendo fiesta! Riba e anochi aki lo ofresé un homenahe spesial na e gran músiko, Rignald Recordino. “Loke ta hasi e anochi aki realmente great ta ku nos ta batisá nos dòbel CD, pues pa nos kombiná e dos detayenan aki riba un solo anochi ta algu fantástiko”, esaki di akuerdo ku Pikero.

“Mi a komponé un tumba instrumental titulá ‘Pa Doble RR’ i ta e intenshon pa esaki zona pa promé biaha durante di e fiesta aki. Mi a sinti ku komo músiko hóben ta un gran honor di por a biba den Rignald Recordino su époka, e ta un músiko multifasétiko i mi tin gran atmirashon p’e, pa su komposishonnan i e tantísimo éksitonan ku e a sa di pega; mi por únikamente aspirá di ta manera e un dia”.

Djasabra dia 2 di yüni, Lanthùis Groot Davelaar ta keda kombèrtí den un sala di fiesta pa e tremendo kombinashon aki: DREAMS, ERA i Doble R Klásiko. E selebrashon pa boutiso di e dòbel kompakto aki lo ta tur afó; lo tin presentashon spesial di Tico Libie i tambe Urvin ‘Luwi’ Yano ku lo interpretá piesanan komponé pa Axel Pikero. Fanátikonan lo skucha ‘Bo n’ duna tempu tempu’ un di e hitnan di semper ‘Mala fe no por gana buena fe’ i no por keda sin menshoná ‘Poko poko tur kos lo kana bin’.

“Ta e máksimo intenshon pa durante di e fiesta aki ofresé un variashon musikal kompletu...tur hende por sinti nan mes na kas, den un ambiente dushi i diferente. Nos ta warda tur nos fanátikonan i amante di bon fiesta pa selebrá e boutiso huntu ku nos i pa disfrutá di e tremendo ambiente!” di e forma aki Axel Pikero a finalisá.
Karchinan di entrada ya kaba ta na puntonan di benta kustumbrá na rason di 25 florin i optenibel na Beep Beep RIO 24/7, Mensing’s Caminada i Tik Tak den Punda.

THE CARIBBEAN GOSPEL SONG FESTIVAL 2012

Caribbean Gospel Foundation ta preparando pa trese nan di 30 Festival di Kanto di Gospel, dia 2 di yüni próksimo.

E festival dje aña aki lo konta ku partisipashon di kantantenan di Bonaire, St. Maarten, Trinidad & Tobago, Repúblika Dominikano, Sürnam, Barbados, Curaçao etc.

Komo artistanan invitá lo tin presentashon di Egleyda Billiard, ganadó di Festival di Gospel 2007, Kor the Vocals, Kor di Sra. Anna Aalse.
E festival dje aña aki lo ta dediká na Pastor Welton ‘Papi’ Esprit, Pastor Reverendo Patmore Henry i August Winter.
Kòrsou lo keda representá pa Carlos Salsbach, Swubert Concincion, Alisha Winter, Veanira Reed, Nichole A. Griffin, e ganadó di 2011, Christeline Corasol i un di e organisadónan, Sr. Bernard R. Peters.

‘The Caribbean Gospel Song Festival 2012’ ta tuma lugá dia 2 di yüni den ouditorio di WTC. Entrada ta 35 florin (na porta 40 florin), pa mucha i hóbennan te ku 12 aña entrada ta kosta 20 florin. Karchi ta optenibel na Mensing’s Caminada, Kas di Beibel, Tik Tak, serka tur partisipante i na telefon serka Bernard Peters 666-7081, 516-7081, Bertrand Peters 694-5270 i Sra. Delta Merien 868-0268 òf 560-5916.